كيف تصبح شخصية اجتماعية

استعرض الموضوع السابق استعرض الموضوع التالي اذهب الى الأسفل

كيف تصبح شخصية اجتماعية

مُساهمة  minagou في الأحد يوليو 18, 2010 8:11 pm

وصفة التخلص من الخوف الإجتماعي واكتساب شخصية اجتماعية
كم وقت عدى عليك كان نفسك تبقى إنسان اجتماعي ومحبوب جداً ومشهور والناس كلها عارفاك
وكام موقف تصرفت فيه بطريقة معينة مع الي حواليك وبعد انتهاء الموقف ندمت
على كل كلمة قلتها واتمنيت الوقت يرجع تاني والموقف يتكرر عشان تتصرف
بطريقة مختلفة بتقول لنفسك ياه أنا كنت غبي اوي ازاي انا اتصرفت بالطريقة
دي .
كام مرة كنت مع مجموعة من أصحابك أو أصحاب أصحابك وشفت حد فيهم منطلق
ولسانه سكر وشكله بيقول إنو طول عمره اجتماعي وصحابه كتير جداً ومحط
الأنظار كلها واتمنيت جواك تبقى الشخص دا ولو ليوم واحد بس .
اقولك على حاجة : كل الناس لديهم خوف اجتماعي بدرجة معينة ، عارف على
مستوى العالم الخوف الاجتماعي Social Phobia هو الخوف رقم 1 على مستوى
العالم والمفاجأة إن الخوف من الموت Death Phobia هو الخوف رقم 7 يعني
الناس تفضل تموت على انهم يقومو يتكلمو في موقف اجتماعي. تفتكر ليه السبب
..
فاكر وانتا صغير كانت ماما بتقولك ايه ، أوعى تتكلم مع حد ويضحك عليك أو
يستغلك ، خليك حريص وفتح عينيك على الآخر، وبابا أوعى زملاتك يضحكوا عليك
ولما بتفكر بينك وبين نفسك ، بتلاقي خواطرك بتقولك خليك عادي واتصرف
باعتدال عشان محدش يضحك عليك ويبقى شكلك مش كويس أدام الناس ..
عارف كل دا بينتج إيه بينتج خوف اجتماعي Social Phobia بيخليك تفكر كتير
في كل تصرف تعمله وكل كلمة تقولها وفي أغلب الوقت بتتجنب المواجهة وتفضّل
إنك تنسحب وتعيش في عالمك الخاص وتعزل نفسك ودا بيعزز الخوف الاجتماعي
جواك اكتر واكتر ..
أمال الحل ايه .. ا لحل في وصفة من 8 خطوات أو 8 مراحل اعملهم علطول في كل
وقت وبأكبر عدد من التكرارات تقدر عليه وأقولك على سر في 21 يوم بالكتير
هتكتسب شخصية اجتماعية هتبهرك انتا شخصياً قبل ماتبهر الي حواليك بس بشرط
21 يوم يعني 3 اسابيع في كل اسبوع حاول تكون 12 مرة في موقف اجتماعي (مش
شرط زيارات عائلية أو موقف اجتماعي تقليدي )ممكن اصحابك الي حوالين بيتك ،
ممكن عيلتك نفسها ، ممكن الراجل الي جنبك في العربية ، ممكن البقال الي
تحتت بيتكم أي موقف فيه ناس حواليك مش شرط هما أد ايه واحد اتنين تلاتة
مفيش أي مشاكل متهيألي دي مش صعبة أوي وتطبق الخطوات دي يعني المحصلة كلها
في 21 يوم 36 موقف اجتماعي و36 مرة انتا بتطبق المراحل 8 دول وفي الأخر
اكتبلي وقولي على التغيير الي حصلك
أقولكم على حاجة كمان : كام واحد فينا بيحب ألعاب الفيديو جيم والبلاي
ستيش ، وبيعد أدام التلفزيون كتييير يتابع حاجات هوا زهق منها ومن كتر
ماشافها ، وغير كدا كمان بيتفنن انو تبقى ليه هوايات أغلبها مع نفسه بدون
الآخرين عارفين دا ليه دا هروب ناعم من المواجهات الاجتماعية والمواقف
الاجتماعية المختلفة .

لكن ايه هيا الخطوات 8 لاكتساب شخصية اجتماعية
1. الاتصال البصري(بص لأي حد بتكلمه في عينيه ) مع الابتسامة الساحرة
2. اتكلم مع ناس غريبة متعرفهاش .
3. اتعلم تتكلم مع البنات (دا لو كنت لد هتخليك تكون حساس وعميق)
4. خلي حواراتك ممتعة للي حواليك (هتكتسبها بالتكرارا والتدريب)
5. كن عطوف على الآخرين " اللمس " ( سلم باليدين ، اربت على الكتفين ...إلخ).
6. إتكلم بحرارة وعاطفة (خلي فيه اتصال عميق بينك وبين الي حواليك .)
7. كن شخص يعتمد عليه (خلي عندك حاجة تقدر تقدمها للآخرين )
8. كن محط الأنظار (دا الهدف النهائي من الشخصية الاجتماعية)

طب تعالوا الوقت نفصل الخطوات دي شوية .
1. الاتصال البصري ( بص لأي حد بتكلمه في عينيه ) مع الابتسامة الساحرة
مشوفتش حد قبل كدا في حياتك أثناء ما بتتكلم معاه بتحس ليه سحر خفي ،
بتحسه شخصيته جذابة ومش عارف ليه ولا عارف ايه السر في الشخص دا عارف ايه
السر ، السر في نظرة عينيه مع ابتسامته .
لو عرفت ازاي تتحكم في نظرات عينيك وتديها العمق المناسب والمكان المناسب
الي تنظر وعرفت ازاي تتحكم في ابتسامتك هتلاقي معجزة حصلت في اتصالك مع
الي حواليك هتلاقي الي حواليك بينجذبو ليك بطريقة خفية وانتا نفسك مش عارف
ليه (الا لو كنت قريت المقالة دي طبعاً )
افتكركدا معايا : كم مرة في الماضي وانتا كنت بتتكلم مع حد وبصيت في عينيه
صح وبعمق مناسب هتلاقي نفسك مش فاكر امتا بالتحديد وهتلاقي كمان ان لو دا
حصل فهو حصل بطريقة عشوائية بدون تحكم منك وكمان ابتسامتك كنت مش عارف
امتا تبتسم وازاي تبتسم . لإنك بتتصرف في المواقف الاجتماعية بدون وعي
بتتصرف بتلقائية شديدة ودي اكتر حاجة تضيع منك سحر شخصيتك امام الآخرين .
يبقى البداية كن واعي بنظراتك وابتساماتك ، قبل ماتحاول تتحكم فيهم راقب
حاليا انتا ازاي بتتصرف مجرد راقب وارصد بس بعد كدا هييجي التحكم تلقائياً
مع الوقت والتكرار.
بلائ بقة تبقى مبتسم علطول وسنانك طالعة في الهوا كدا زي مصاصين الدماء إلا لو كنت عاوز شكلك يبقى غبي ي ي ي .
لكن ابتسم لو فيه حاجة تدعو للابتسام بجد واتمرن على الابتسامة امام
المرآة ، عشان تشوف أروع ابتسامة ليك واكتر ابتسامة بتخليك أكتر جاذبية .
(باختصار وتصرف شديد)
2. اتكلم مع ناس غريبة متعرفهاش .
هقولك على حاجة غريبة انا كنت بدايق جداً جداً من الناس الي بتبدأ تتكلم
معايا وهيا متعرفنيش ياسلام لو راكب في العربية ولا المترو ولا ماشي في
الشارع وحد حاول يتكلم معايا ويرغي معايا شوية دا لو مش بيسألني على مكان
معين مثلاً .والغرابة ان انا الوقت بقيت واحد من الناس دول (بتكلم كتير مع
ناس معرفهاش ولا تعرفني ) .
بس استنى شوية وركز معايا خلي بالك انك لما تتكلم مع الغريب عنك ولسة
متعرفوش هتكتسب مهارة رائعة جداً انك هتتكلم مع كل واحد بلغته دا لو انتا
طبعاً ذكي وهتسيبه هوا يتكلم اكتر لو مثلاً صنايعي في أي مكان أو بياع أو
لو راجل كبير في السن....إلخ انتا لازم تكلمه بلغته عشان هوا يفهمك وتفهمه
كويس (والسر هنا في تقنية من البرمجة اللغوية العصبية وهي بناء التوافق ،
ببساطة خد نفس عميق واقف زي الشخص الآخر وخلي وضع ورجليك بالضبط زي الشخص
الأخر، واتنفس زيه وحاكي كل اوضاعه الحركية لو وضع اديه على خده اعمل زيه
.. الخ .. هوا دا بناء التوافق مفيش معجزة وفي الآخر استخدم نفس المصطلحات
والكلمات الي بيستخدمها الشخص الآخر ايه إحساسك وانتا بقيت الشخص الآخر ) .
وفي النهاية هتكتسب مرونة غير عادية في تعاملك مع الناس الي حواليك ودي في
حد ذاتها مهارة لا تقدر بثمن . كل ما تتطلبه شوية شجاعة مش أكتر ودي كمان
هتيجي بالتكرار مفيش أي معجزة لازم تحصل كل حاجة هتيجي بالتكرار وبالهدوء
من غير استعجال أو عصبية .
3. لو انتا ولد حاول تتكلم مع البنات كتيير :
طريقة عمل عقل البنت تختلف عن عقل الشاب لإن البنت عقلها بيعمل بطريقة
عاطفية بتهتم أكتر بالعواطف والمشاعر الموجودة في أي موقف حواليها اكتر من
اهتمامها بالعقل والمنطق والتفكير التحليلي وكمان عقل البنت بيعمل بطريقة
غير خطية NonLinear يعني ممكن تفكر وتعمل أكتر من حاجة في نفس الوقت بدون
خطأ على عكس الشاب عقله بيعمل بطريقة خطية Linear يعني لازم يركز في حاجة
واحدة في الوقت الواحد حاول تكلم والدك وهوا بيتفرج على متش الأهلي
والزمالك ومركز اوي واسأله عن رأيه في عربية جاركم مثلاً وشوفه يعمل فيك
ايه (أنا ماليش دعوة بالي هيحصلك ) لكن روح لوالدتك كدا في المطبخ
هتلاقيها بتقلب الرز مثلاً على النار وفي نفس الوقت بتكلم في التليفون ،
وفي نفس الوقت شايلة ا خوك الصغير على كتفها بتهديه وبتعمل كل دا بكفاءة
تامة مركزة في التليفون ومركزة مع الطبخ ومركزة مع اخوك الصغير ..
فانت لما تتكلم مع البنات وتقدر تتصل معاهم كويس وتتفاهم معاهم وتتعامل مع
عقليتهم دا هيخليك تقدر تهتم بالجانب العاطفي والمشاعر في المواقف الي
حواليك وهيخليك تقدر تتعامل مع اكتر من حاجة في نفس الوقت وبكفاءة وبرضه
دا هييجي أكتر بالتدريب والتكرار .




الجزء الثاني : الخطوات الـ8 لاكتساب شخصية اجتماعية .
4. اجعل حواراتك ممتعة مع الناس الي حواليك .
هفاجأك مفاجأة لما تتكلم مع أي حد غريب عنك لأول مرة لازم تكون مستعد أنك
إنتا الي تتكلم 90% مش بس تبدأ الحوار لاء كمان لازم تخلي الحوار مستمر ،
وعشان يكون مستمر لازم ميكونش ممل
, اقولك على حاجة كويسة كن مستعد انتا الي تبدأ مسارات الحوار والناس الي
بتتكلم معاهم هما الي يستجيبوأ فبالطريقة دي بتديلهم الاختيار إنهم يكملوا
معاك الحوار أول لاء مش بتجبر أي حد على حاجة وهما طبعاً بيكونو حاسين
بالتحكم في مسار الحوار بس انا وانتا عارفين من المتحكم فعلاً في مسار
الحوار ، وبصفة عامة المواضع الغير مملة للحوار العادي ( السينما والأخبار
الجديدة ، الرياضة والكورة (دي مع الشباب بس ) ، اخبار الممثلين والمشاهير
، الترحال والسفر والأماكن الغريبة في العالم ، .... إلخ ..
وحاول بلاش تتكلم في مواضيع سياسية وعرقية ، وتعصب كروي .. إلخ . عشان انتا عارف آخرة الحوارات دي بتخلص على إيه ..
فيه حاجة ارجوك حاول متعملهاش نهائياً ، الصمت الغير مريح عارف لما تكون
لسة متعرف على حد جديد وبتتكلمو مع بعض وبعدين فجأة تحس إن الكلام وقف
مفيش كلام يتقال (أنا شخصياً عانيت من دي كتير ) دا بيكون أكبر سبب من أسباب تدمير الألفة مع الآخرين ، ويبقى انطباعه عنك .. أنتا عارف عامل ازاي ....
فأول لما تحس ان الموضوع الي بتتكلم فيه خلاص انتهى وبئى مافيش حاجة تانية
تتقال ادامك حاجة من اتنين إما انك تبدأ موضوع جديد تماماً أو إنك تستأذن
وتتكلم مع أي حد تاني حواليك .
عشان الانطباع الأول المبدئي مهم جداً صدقني ياصديقي ... (برضو دي كانت
احدى المشاكل عندي كانت الناس حواليا بتاخد عني إنطباع أن أنا جاد جداً .
بزيادة عن اللزوم )
أبداً أبداً ... متحاولش تشتكي من حياتك ومن الظروف الي حواليك أو تتكلم
في أي حاجة سلبية خليك إيجابي وكلامك ، بيشع إيجابية وتفاؤل الناس بتحب
تكون حوالين الإنسان المتفائل مش الإنسان الي بيزود مشاكلهم أكتر وأكتر ..
متسألش الناس إلي حواليك أسئلة كتيرة عن نفسهم وعن حياتهم ، مفيش مشكلة
انك تعرف هما مين وساكنين فين وسنهم أد ايه . بس بلاش تدخل في حياتهم
الشخصية ، ولما تحب تعرف معلومة عن أي حد من الناس الي حواليك خليك مستعد
انك كمان تقول معلومات زيها عن نفسك .

5. كن عطوف على الآخرين " اللمس " ( سلم باليدين ، اربت على الكتفين ...إلخ).
اللمسات الحنونة من أهم معالم التفاعلات الاجتماعية بين الناس ، نحن منذ
ولادتنا شغوفين باللمسات الحنونة ، التربيت على الكتفين ولمس اليدين
(الكوع ، ظهر اليدين ، خلف الذراعين ، كف اليدين ) الحقيقة الموضوع محتاج
لتدريب في كورس أو ورشة عمل عشان يبقى واضح في الذهن بصورة جيدة ، ولكن
الذي أستطيع قوله هنا هل سمعت كلمة " الصورة تغني عن ألف كلمة " هنا
اللمسة توصل العواطف والمشاعر أكثر من ألف كلمة .


6. إتكلم بحرارة وعاطفة (خلي فيه اتصال عميق بينك وبين الي حواليك .)
عمرك اتكلمت مع حد ولقيته كأنه بيقرأ جريدة بيكلمك بطريقة معينة لو
بيحكيلك قصة فيها دراما أو مصيبة هتلاقي نفس الطريقة (نغمة الصوتTone ،
معدل تسارع الكلمات Speed Rate ، الفراغ والمسافة بين الكلمات ... إلخ )
بطريقة مملة ورتيبة ، تخيل لو اجبرتك الظروف تكون مع إنسان ز يدا لمدة
ساعة أو أكتر هيغمى عليك كام مرة وانتا معاه ، ...
هل كنت مرة بتتكلم في التليفون ومعاك حد رغاي بشكل غير عادي لدرجة انك سبت
سماعة التليفون جنب التليفون ورحت عملت كباية شاي ورجعت لقيته لسة بيكلم
نفسه
دي نماذج على الكلام بطريقة عادية Flat مملة ومحبطة ورتيبة وتجيب الزهق وتخليك تكره نفسك ..
فأرجوك كمان مرة بلاش تكون الشخص دا ، دي اقصر طريقة تدمر شخصيتك
الاجتماعية بدون أي مجهود منك درب نفسك على توصيل المشاعر في الكلمات
ونبرات صوتك يعني لو بتتكلم في موقف فيه فرح خلي مشاعر الفرح باينة في
صوتك ، لو بتتكلم على موقف دراما خلي في دراما في صوتك .. إلخ ..
خليني اقولك على حاجة بسيطة بتحصل معايا دوماً لما اتعرف على حد جديد
بتفاجأ إنو أغلب الناس منغلقين على شكلهم بشكل غير طبيعي ، ومنعزلين وكل
واحد بيحاول يحمي شخصيته على اد مايقدر بطريقة تخلي التفاعلات الاجتماعية
كأنها معركة حربية مصغرة عارفين المشكلة دي بتنتهي ازاي لو عرفنا كلنا انه
:
1.كل واحد فينا قوي بما يكفي انو يحول أحلامه لحقائق ، ويغير مصيره زي ماهوا عاوز تماماً .
2. كل واحد فينا ممكن يموت الوقت أو بكرة وتنتهي حياته بغمضة عين .
3.مفيش حاجة اسمها مصادفات وعشوائية في الحياة كل حاجة ليها هدف وليها
طريقة لتحقيقها . يعني مجرد قراءتك للمقالة دي مش مصادفة أكيد دي ليها غرض
وغاية وانتا لوحدك الي تقدر تثبت دا .
ملخص الكلام دا انو لو كل واحد فينا عرف التلات نقاط دول يبقى أحسن حاجة
يعملها لنفسه إيه ، يعيش اللحظة دي ويتمتع بيها لأقصى قدر من غير مايضيع
وقته في التفكير والتحليل على الفاضي اتكلم مع كل حد وأي حد وفي أي وقت
بعد فترة وجيزة هتكون مشهور وأصحابك كتير وهتكشف ساعتها إن الدنيا فعلاً
فيها أصدقاء وأصدقاء بمعني الكلمة مش مجرد كلام وبس .
7. كن شخص يعتمد عليه (خلي عندك حاجة تقدر تقدمها للآخرين )
تعرف حد عايش حواليك مالوش أي هدف في حياته ولا عنده أي حاجة يقدمها لنفسه
فضلاً عن إنه يقدمها للآخرين بس بياكل ويشرب وينام .من غير أي هدف ، لو
بقيت معاه 5 دقايق تحس بمنتهى الإحباط والرغبة في الانتحار ، أنتا ممكن
تكون الشخص دا للآخرين وانتا مش واخد بالك احذر المطب دا ، خليك دوماً
مطلع على الدنيا حواليك ، خلي عندك أخبار تديها لكل إلي حواليك ، خلي عندك
حاجة تفيد بيها الناس الي حواليك ..ألخ .
ودي مش حاجة صعبة تابع الجرايد واقرأ الأخبار ، خليك متميز في مجال معين
علمي ، فني ، المهم باختصار خلي عندك حاجة الناس محتاجاها منك .


8. كن محط الأنظار (دا الهدف النهائي من بناء الشخصية الاجتماعية)
اتفرج عليك الوقت ، بتعرف تعمل اتصال بصري كويس جداً مع أي حد تكون معاه ،
بتعرف تتكلم مع أي ناس غريبة متعرفهاش وتبني ألفة كمان معاهم ، بقيت
بتتكلم مع البنات بطريقة عادية بقيت حساس وعميق ، أسلوب حوارك أصبح ممتع
ورائع ويخطف الآذان ، عطوف على الآخرين لمساتك مليئة بالحنان والعطف ،
كلامك مليء بالحرارة والمشاعر ، أصبحت شخص يعتمد عليه الآخرين ..
عارف أصبحت عندك هالة الشخصية الاجتماعية ، أصبحت جذاب أصبحت محط الأنظار
الكل يطمح لصداقتك والتقرب منك ، بتحس بتغييرات عميقة بتحصل جواك ، كل هذه
التغييرات الصغيرة بتحصلك وتتراكم بعضها فوق بعض ويبدأ التغيير التدريجي
يحصلك وزي ماقلتك في بداية المقالة (راجع الجزء الأول ) في 21 يوم فقط كل
حياتك الاجتماعية هتتغير .. باتباعك القواعد الـ8 دول وتكرارهم باستمرار ..
أصبح لديك البرهان الاجتماعي في أي مكان تذهب إليه يصادقك الآخرون بسهولة
، تحس بأن العالم أصبح ملعبك أنت وكل شيء تريد تحقيقه لا يوقفك شيء
..وأصبح لديك الاستعداد لتكون هذه الشخصية الاجتماعية المشهورة التي كنت
تحسدها في الماضي
وفي النهاية دعنا نراجع الخطوات الـ8 من جديد

1. الاتصال البصري(بص لأي حد بتكلمه في عينيه ) مع الابتسامة الساحرة
2. اتكلم مع ناس غريبة متعرفهاش .
3. اتعلم تتكلم مع البنات (دا لو كنت لد هتخليك تكون حساس وعميق)
4. خلي حواراتك ممتعة للي حواليك (هتكتسبها بالتكرارا والتدريب)
5. كن عطوف على الآخرين " اللمس " ( سلم باليدين ، اربت على الكتفين ...إلخ).
6. إتكلم بحرارة وعاطفة (خلي فيه اتصال عميق بينك وبين الي حواليك .)
7. كن شخص يعتمد عليه (خلي عندك حاجة تقدر تقدمها للآخرين )
8. كن محط الأنظار (دا الهدف النهائي من الشخصية الاجتماعية)


minagou
Admin

المساهمات : 1035
تاريخ التسجيل : 13/07/2010

معاينة صفحة البيانات الشخصي للعضو http://kelmetmanfa3a.forumaction.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى